د پښتون ژغورنې غورځنګ (پي ټي اېم) اروپا غړو د ۲۰۲۵ کال د نومبر په ۲۱مه، په بروکسل کې د اروپا پارلمان مخې ته د پاکستان د مرستیال لومړي وزیر او بهرنیو چارو وزیر اسحاق ډار د سفر په غبرګون کې لاریون وکړ.
لاریونوالو له اروپايي ټولنې وغوښتل چې له پاکستان سره مرستې ونه کړي. هغوی د پاکستان پر دولت تور ولګاوه چې د ترهګرۍ ملاتړ کوي او د پښتنو او نورو قومي ټولنو پر وړاندې نسلوژنه ترسره کوي.
لاریونوالو له اروپا پارلمان څخه وغوښتل چې له پاکستان سره خپلې همکارۍ او مرستې له سره وارزوي. د هغوی په وینا، له داسې دولت سره مرسته کول چې د ترهګرۍ پر ملاتړ او د بشري حقونو پر جدي سرغړونو تورن دی، ښايي په غیرمستقیم ډول له دغو کړنو سره مرسته وکړي.
د پي ټي اېم فرانس غړو هم په دې لاریون کې ګډون وکړ او د عدالت، حساب ورکونې او په پاکستان کې د پښتنو او نورو ځپل شویو ټولنو د حقونو د ساتنې لپاره یې د غورځنګ له غوښتنو سره خپله پیوستون څرګند کړ.