موږ څوک یو؟

موږ د پښتون افغان وطن د بشري حقونو یو سوله‌ییز، سیاسي خو غیر پارلماني او ولسي غورځنګ یو، چې د پښتنو افغانانو د مدني، ټولنیزو او اقتصادي حقونو د دفاع لپاره کار کوو او د سیمې له ټولو مظلومو ټولنو سره پیوستون لرو.

پښتون ژغورنې غورځنګ د پاکستانی ریاست د لسیزو سیستماتیک ظلم او تېریو په پایله کې رامنځته شوی. موږ د جبري ورکېدنو، له قضا پرته وژنو او د پاکستانی فوځ او استخباراتو له ملاتړه برخمن ترهګرۍ پر وړاندې غږ پورته کوو.

موږ سره له دې چې په ۲۰۲۴ کال کې د پاکستانی حکومت له خوا راباندې بندیز ولګېد، لا هم د حقیقت، عدالت او سوله‌ییزې مبارزې لپاره ژمن یو. زموږ ګڼ مشران، غړي او ملاتړي په ناقانونه توګه نیول شوي، له محاکمې پرته زنداني شوي، په شخصی او پتو زندانونو کې ساتل کیږي او په ځینو مواردو کې له محکمې پرته په بند کې وژل شوي دي؛ ان د هغوی له کورنیو څخه د ویر او ماتم او د پښتنې دود سره سم د تدفین او فاتحې حق هم اخیستل شوی دی.